Psa 125 | KGF | STEP | (Ocmuŋiguc eŋeŋawac legic.) Yaweac héima naŋanʒu imi eneŋ Zion boŋanéŋ Yerusalem lelecgémima ménda hirima hémbénaŋa qiŋ héima tacselizac ésécnec wammu.

Psalms 125

1 (Ocmuŋiguc eŋeŋawac legic.) Yaweac héima naŋanʒu imi eneŋ Zion boŋanéŋ Yerusalem lelecgémima ménda hirima hémbénaŋa qiŋ héima tacselizac ésécnec wammu. 2 Baec boŋa imuac sia yandanéŋ Yerusalem lelecgéma nanʒac ésécnec Yawenéŋ hénaoriŋ héra deguc muacnec hémbénaŋa lelecgé énécmima kecmac. 3 Ic solaŋa ieneŋ képésic wambiŋ ʒé méragina suluwu niŋac Anutunéŋ imuhuc waŋ énécmianʒac. Ic biria ionac ic kewuac ɋarucnéŋ ic solaŋa ionac buŋa qeénécmimia baec imuaru ménda galeŋgé énécmima kecmac. 4 Yawe gi ic hiabia ʒéma ic qeri solaŋ kecanʒu ionac mia hiabia waŋ énécmina.

5 Eŋaŋ héna ɋariŋ ɋariŋgiawac liliŋgéma keŋanʒu imi onac imi Yawenéŋ waŋ énécmiyu biria meme ic iniguc momacnec kemmu, néŋ Israel ionac muru imi luae hema kecmac niŋac wanʒua.